ଗାଜା : ଗତ ୮ ମାସରୁ ଅଧିକ ସମୟ ଧରି ଚାଲିଥିବା ଗାଜା ଯୁଦ୍ଧରେ ଇସ୍ରାଏଲ ସେନା ଏପର୍ଯ୍ୟନ୍ତର ସବୁଠାରୁ ଦୁଃସାହସିକ, ଜଟିଳ ଏବଂ ବିପଦପୂର୍ଣ୍ଣ ଅପରେସନ କରିଛି । ଏହି ଅପରେସନକୁ ସତୁରୀ ଦଶକରେ ହୋଇଥିବା ଅପରେସନ ଏଣ୍ଟେବେକୁ ତୁଳନା କରାଯାଉଛି । ଇସ୍ରାଏଲ ସେନା ଶନିବାର କହିଛି ଯେ କେନ୍ଦ୍ରୀୟ ଗାଜାରେ ଏକ ସଫଳ ଅପରେସନରେ ୪ ଜଣ ବନ୍ଧକଙ୍କୁ ମୁକ୍ତ କରାଯାଇଛି।
ଟାଇମ୍ସ ଅଫ୍ ଇସ୍ରାଏଲ ରିପୋର୍ଟ ଅନୁଯାୟୀ, ୪ ଜଣ ବନ୍ଧକ ନୋଆ ଆର୍ଗାମନି (୨୬), ଆଲମଗ୍ ମୀର ଜାନ୍ (୨୧), ଆନ୍ଦ୍ରେ କୋଜଲୋଭ (୨୭) ଏବଂ ଶ୍ଲୋମି ଜିଭ୍ (୪୧)ଙ୍କୁ ଉଦ୍ଧାର କରିବା ପାଇଁ ଅପରେସନ ଅନେକ ସପ୍ତାହ ପୂର୍ବରୁ ଯୋଜନା କରାଯାଇଥିଲା। ଏହି ଅପରେସନର ନାମ ପ୍ରଥମେ ‘ସିଡ୍ସ ଅଫ୍ ସମର’ ରଖାଯାଇଥିଲା, କିନ୍ତୁ ପରେ ଅପରେସନ୍ ସମୟରେ ନିହତ ହୋଇଥିବା ଇସ୍ରାଏଲ ସେନାର ମୁଖ୍ୟ ଇନ୍ସପେକ୍ଟର ଆର୍ନନ ଜାମୋରାଙ୍କ ନାମରେ ଏହାର ନାମ ‘ଅପରେସନ୍ ଆର୍ନନ୍’ ରଖାଯାଇଥିଲା।
ଏହି ଅପରେସନ ଯୋଜନା କରିବା ସମୟରେ ଇସ୍ରାଏଲ ସେନା ବନ୍ଦୀମାନଙ୍କ ଅବସ୍ଥାନ ସମ୍ବନ୍ଧୀୟ ଗୁଇନ୍ଦା ତଥ୍ୟଉପରେ ତୀକ୍ଷ୍ଣ ଅନୁଧ୍ୟାନ କରିଥିଲା, କାରଣ ଯୁଦ୍ଧ ଆରମ୍ଭରୁ ହମାସ ବନ୍ଧକଙ୍କ ସ୍ଥାନ ବଦଳାଉଥିଲା । ଏହି ଅପରେସନ୍ ପୂର୍ବରୁ ସେନାର ସ୍ୱତନ୍ତ୍ର ୟୁନିଟ୍ ୟାମମ୍ କେନ୍ଦ୍ରୀୟ ଗାଜାର ନୁସେରାଟରୁ ବାହାରକୁ ଯାଉଥିବା ରାସ୍ତାରେ ଅନେକ ଅଭ୍ୟାସ କରିଥିଲା। ସାମରିକ ଅଧିକାରୀମାନେ କହିଛନ୍ତି ଯେ ଏହା ୧୯୭୬ ମସିହାର ଏଣ୍ଟେବେ ଆକ୍ରମଣ ଭଳି ଥିଲା, ଯେତେବେଳେ ଇସ୍ରାଏଲ କମାଣ୍ଡୋମାନେ ଉଗାଣ୍ଡାରେ ୧୦୦ରୁ ଅଧିକ ବନ୍ଧକଙ୍କୁ ଉଦ୍ଧାର କରିଥିଲେ।
